Stormsamlinga 2011

I helga var det klart for nok ei Stormsamling på Bulandet. Askvoll padleklubb stod som arrangør, i lag med Njord og God Tur i Bergen. Dagen på laurdag starta med dette veret, men enda opp med gråver og kuling seinare på dagen.

Slik var veret det då vi padla ut for å leite etter fine leikeplassar:

Det var ikkje så lett å finne noko. Det var nok av bølgjer, men dei kom frå alle kanter og var uregelmessige. Uansett god trening å padle i slike forhold også! Og nokre surfar vart det.

Laurdagen vart avslutta med super mat og god stemning i Floren til Liv Turid. Det var framvisning av bilete frå dagen og etterkvart lett underhaldning frå eit samanraska padleband.

Søndagen vakna vi opp til så å seie vindstille og lettare ver:

Denne dagen var det høve til å finne stader der sjøen braut. Her eit par bilete frå føremiddagen:

Eivind likar betre å bade. Dette vart vondt..

På denne sida vert det lagd ut fleire bilete i løpet av veka. Vi hadde også med oss ein profesjonell fotograf (og båtførar .-). Blir spanade å sjå kva han har å kome med...

Og for dei som ikkje visste det: Bulandet er paradis på jord!

Myte- knusar?

Eg var ein liten ettermiddagstur utpå i dag, for å trene litt teknikk og redning. Mykje av padlinga gjekk føre seg tett inntil land der eg øvde på kanting og diverse styretak.

Veret var slik som det har vore den siste månaden, grått og vått..

Eg har øvd litt i det siste på å ta trekket på kajakken under vatn, før eg rullar opp. Dette er ikkje spesielt vanskeleg å få til. Mykje handlar om å halde pusten lenge nok. Og sjå mest mogleg tåpeleg ut..



Men eg er litt i stuss på kva som eigentleg er vitsen med å ta trekket på under vatn. Eg trudde vekeleg det var større forskjell i kor mykje vatn som kom inn i sitjebrønnen.

Så mykje vatn kom inn, då eg tok trekket på før rulla:

Og så mykje vatn kom inn utan å ta trekket på først (Vanleg re- entre og rulle):

Det kan nok vere store forskjellar på kor mykje vatn som kjem inn, alt etter kva kajakk ein har. Men med denne kajakken (NDK Explorer), var forskjellen marginal.

Det kan vere at det uansett har sin misjon, viss faren for å få fyllt opp sitjebrønnen etter ein rullar opp, er stor. Td ved brottsjø og store bølgjer.

Padletur og insektsafari..

I dag hadde eg med meg eldstemann og ein annan gut på tur, innover leira.

Fin dag for padling!

Etter turen såg vi at det var mange sommarfuglar og andre insekt på treet utanfor klubbhuset vårt. Det kom ein søt, roten lukt frå treet. Det må vere denne lukta som tiltrekte seg alle desse krypa..

Eg prøvde å søke litt på nettet for å finne ut kva denne typen sommarfugl heiter. Men med over 4000 artar. var det ikkje så lett..

Kvepsen var også interessert i dette treet:

Og denne flua som hadde eit slags kobbarlys på ryggen:

Rart å sjå denne samlinga på eitt einaste tre.

Test av nytt kamerastativ

Eg har lenge brukt eit kamerastativ på kajakken når eg har filma videoar. Dette:

Men problemet med dette stativet, som ikkje er meir enn 10 cm høgt, er at det kjem for lavt, og filmane viser eigentleg mykje rygg og lite anna. Difor har eg, i beste Reodor Felgen- ånd, laga eit som er høgare opp. Slik ser det ut:

I dag var det prøvetur for å teste om stativet heldt vatn.. Litt skitten sjø, etter dei siste dagars syndeflod. Først berre padling:



Godkjend!

Men ville det halde seg på plass ved øvingar der det kjem ned i vatnet? Svaret finn du her:



Konklusjon:

Inn att i verkstaden for å mekke meir. Føtene løsna frå der dei var plassert nedi nedsenkningane, ved taufeste bak. Her må eg nok feste dei på ein annan måte,. Sugekopp? Det positive er at barduneringa fungerte fint. Alle strammingar ned mot dekket heldt seg bra under heile testinga. Dette trur eg at eg skal få til på ein eller annan måte..

Og til slutt legg eg ved eit bilete av superkajakken over alle superkajakkar:

Surfing i småbølgjer!

I dag blåste det opp til liten kuling. Då vart det høve til å leike seg litt utpå fjorden. Eg prøvde å få til nokre surfar på dei bølgjene som var i dag. Ikkje så enkelt.. Store bølgjer er litt meir slik; "vil du vere med, så heng på", medan mindre, må ein treffe akkurat med tid og fart. Fann til slutt ut at det beste var å leite etter surfbare bølgjer når ein padlar medsjø, prøve å ta dei att, og så forsøke å finne farta. Har pleid å vere litt overivrig tidlegare. Har hatt ein tendens til å padle i frå dei.

Eigentleg ganske overraskande kor stor fart ein kan få på slike korte, små fjordbølgjer:





Under er ein video med litt motsjøpadling. Eg prøvde å kappe med Ekspressbåten..



Litt static brace går også an å øve på. Men med så mykje bølgjer det var i dag, var det ikkje så lett. Må ta med snorkel neste gong.



Ei lita økt med kjekk padling, og god trening. Neste gong skal kameraet høgare opp..

Kveldstur til Eimind fyr

I kveld var eg eigentleg ganske så trøytt. Men eg kom meg over "dørstokk- mila", og kom meg ut på sjøen. Det angrar eg ikkje på!

Det vart ein liten tur til fyret på Eimind i kveld. Etter å ha forsert det triste Granesundet i "transportetappe- tempo", opna det seg opp mot vest. I kveld var det ein fin kveldshimmel også.

Sidan det var så rolege forhold, gjekk det an å gå i land ved fyret:

Røsslyng ER vakkert..

På veg innatt skifta himmelen til mørkare fargetonar, og eg tenkte på at eg hadde gløymt lys..

Men det vart ordna ved å leggje mobilen med lommelykta på, inni Pelican- boksa. Så det vart ein "slags" lanterne:

På denne tida vert det fort mørkt, og neste gong skal det vere lys med på padletur..

Haust = lanternetid!

På tur i Sognefjorden med Njord.

Frå fredag 5. august til søndag 7. august var eg så heldig å få vere med på Njord sin tredagerstur; "Fjord Explorer"

Vi starta i Flåm i grå- ver. Veret var svært varierande undervegs, noko som gjorde at det vart interessant fotolys.Fire franskmenn, to tyskarar og to amerikanarar var med på denne turen. Guiden, kokken, medisinmannen; Ervin i midten:

Det vart etterkvart ganske trolsk stemning fredagen:

Aurland til høgre:

Ervin i sitt rette element:

Maten var fantastisk undervegs. God og variert, og med den beste utsikta i verda:

Laurdagen var det opp tidleg for å gå tur forbi Stigen, og opp til Beitelen:

Stigen gard:

Her er vi på toppen av Beitelen. Utsikt innover Nærøyfjorden:

Alle kom seg opp på toppen. Ein flott gjeng!

Den siste natta overnatta vi før det smalaste partiet av fjorden.

Morgonstemning:

Det kjem truleg ein meir utfyllande rapport, og fleire bilete i bladet; Padling etterkvart.

Dette er ein tur eg kan anbefale på det varmaste!