Far og son-tur 2

I dag laurdag 29. mai hadde eg med meg eldstemann Isak, på ein padletur rundt Prestøyna.

To trøytte blide padlarar med morgonfjes..

I dag var det stille og roleg på sjøen. Det starta med lettskya ver. Men etterkvart kom ei lita regnbyge.

I dag hadde Isak Valley Avocet. Ein kajakkmodell som passar godt for han. Den er også rimeleg stabil.

Nesten havblikk i dag.

Vi kom til eit område med straum. Då vart det tungt å kome framover.  Så det vart ei lita slepeøkt. Greitt å trene på det også.

Eg hadde Aquanaut på turen i dag.

Pinsedag med padling

I dag var Roger og eg på ein liten tur rundt Prestøyna. Som vanleg :-) vart det ein del øvingar på vegen. Og med ullkle, måtte eg berre rulle litt for nedkjøling.

I dag hadde Roger TM Greenland og eg hadde Aquanaut Club. Han likte Greenlanden godt..


Roger med Greenlanden. Sjekk det låge bakdekket..

Lettskya 13 grader:

Roger Kløftveit.  :-)

Roger på veg opp frå ei rulle:

Static brace:

Static brace går bra i ein Aquanaut også:

Far og son- tur.

I kveld var Oskar og eg på ein liten kveldstur. Han hadde Raven- kajakken og eg hadde Greenlanderen. Det vart ikkje så langt i dag heller, men dette er heller ikkje noko mål når ein har med ungar på padletur.

Vart litt rulleøving på meg og litt manøvrering- oppfrisking på Oskar. Første tur for han i år.
Og faktisk: Etter nokre dagar med sol, kan ein kjenne at temperaturen i sjøen har begynt å kome seg. :-)

Vesten han hadde på seg i dag, var litt for stor til han. Så han blei sitjande litt med vesten oppunder øyra.

Etter turen. Litt forskjell i lengd på desse to kajakkane, kan ein kanskje seie?

 

Rulle med greenlanden frå turen  HER

Nydeleg dag for kajakk!

I dag 14.mai var Tron Ivar og eg på ein liten padletur. Det vart ikkje så mange kilometer, men desto meir rulling/sculling. Nydeleg ver og lite vind. Då eg skulle ta på tørrdrakta før turen, rakna halsmansjetten på tørrdrakta. Difor var det ikkje SÅ fristande å rulle for meg i dag. Eg prøvde klubben sin P&H Capella i dag. Ganske fin kajakk, men med fotstøtter som eg ikkje kunne bruke. Difor sklei eg framover i setet heile tida.

Ein flott dag!

Fotografen:

Tron Ivar slurvar med hovudet  ;-)

To videoar frå turen ligg HER.

Prøvetur med TM Greenland T

Fekk ein liten tur med TM Greenland i dag. Dette er ein kajakk som klubben vår truleg skal kjøpe. Første gong eg prøvde den var ute på Vårsleppet i Bulandet. Men då var det så mange andre ting å tenkje på, at eg ikkje fekk nyte det skikkeleg . :-)

           At det er ein vakker kajakk, kan ingen kome i frå..

Det første eg merka var at den har nok ein våtare gange i sjøen enn det eg er van med. Med bølgjehøgd på 20- 30 cm vart det ein del skvetting på dekket og i ansiktet. Fordelen med ein kajakk med så lite volum er jo at den skjærer seg gjennom bølgjene på ein heilt anna måte enn både Cetusen og Marlinen. Så eg kan godt tenkje meg at dette er ein artig båt i litt større sjø. Så lengje ein likar mykje sjø på framdekket, vel og merke.

Ein ting som er veldig bra med denne kajakken er farten. Med litt aksellerasjon på åra, er ein raskt oppe i god fart. Kanteeigenskapane er også svært gode, så lengje ein kantar nok. Er ein modig, ser ein stor reaksjon på svinginga.

Ved ein stad på turen, fekk eg små dønningar frå sida. Då merka eg den store forskjellen på knekkspant og rundare skrog. Den var med på alle rørslene til bølgjene. Opp og ned. Slike småruske- bølgjer er ikkje noko Cetusen bryr seg med. Den fortsett rett fram som eit krigsskip.. Greenlanden var mykje meir levande. Eit problem var å få den til å svingje bort frå dønningane. Den ville parallellt med bølgjene, og helst mot dei.. Då eg fekk den rett frå bølgjene, var den interessert i å surfe, sjølv på små dønningar.

Må også berømme Tahe for arbeidet med å heve kvaliteten på produkta sine. Alt på denne kajakken er forseggjort. Der støpen var dårleg før (rundt cockpit) har dei fått meir glasfiber på. Skikkelege lukar, tau og strikk har også desse nye modellane fått. Prisen å betale er at vekta har gått opp noko.

For meg er det fortsatt litt uvant å sitje med beina rett fram så lengje om gongen. Kajakkar med lågt volum har jo "bakdelen" at beina er meir eller mindre rett fram, utan bøy i knea. Resultatet for meg, blir at beina somnar. Men så er eg stiv som ein stokk også. Rekk ikkje ned til golvet når eg står, og klarar ikkje å leggje hovudet skikkeleg framover på framdekket, som er ein føresetnad for å klare stormrulla.

Så ein videosekvens der eg øvar meg på handrulla. Her brukar eg åra som hjelpemiddel. Den ligg i vatnet. Med litt øving, skal det nok gå bra med handrulla i denne kajakken. Static brace og er ingen sak i denne.

                                                  Video med TM Greenland T

På øya eg tok pause, var våren kome:

Vårsleppet i Bulandet 2010

I helga gjennomførte Askvoll Padleklubb Vårsleppet for første gong. Ca 50 padlarar var samla i to dagar til kurs, guida tur, underhaldning og god mat og drikke. Det såg ikkje så bra ut med veret på fredag. Hagl og snøbyger i løpet av dagen. Dei som kom langvegs ifrå, kunne fortelje om mykje snø på fjellet.. Men laurdag skein sola og søndagen var også bra. Sjølv om det var litt regn og vind. For dei som tok kurs vart det nok litt kaldt med bading i våtdrakt..

Surfevideoar frå Bulandet ligg HER

Frå grunnkurset:

Teknikkurset:

Frå den guida turen:

Frå surfinga:

Liten filmsnutt her: Vårsleppet 2010

Fleire bilete her: Vårsleppet 2010 Bilete

Kald apriltur.

I dag vart det ein liten tur rundt Prestøya. Det var kald, sur vind i dag. Prøvde eit par rullar i dag også, og det var friskt..

Turen i dag var mest for å bli vant med euroåra igjen. Etter eit par månader med kun grønlandsåre, var det skikkeleg uvant med euroåre igjen. Det var nesten som første gong eg prøvde grønlandsåra. Årebladet skar avgarde og eg hadde problem med å orientere meg kvar blada i sjøen var. Men etter eit par timar fann vi ut av det igjen..

I tillegg fekk eg testa det nye kameraet mitt, eit Canon Powershot D10. Sidan dette er vasstett ned til 10 meter, kan ein ha mykje moro med det! Fint å ha eit kamera som toler litt også.

Det vart ein lita (ulovleg) pause på meg i dag. Øya på bilete under er fuglereservat, slik som 99.5 % av alle dei andre øyane her ute, og fredningstida startar i dag (15. april). Så eg er nok ikkje betre enn andre kriminelle. Fredningshysteriet har gått for vidt, etter mi meining. Her ute på kysten har fugl og folk levd saman side om side i mange år og har hatt gjensidig nytte av kvarandres eksistens.

Etter omtrent alle øyane her vart freda, har fuglebestanden gått ned og det er lite fugl å sjå. Ein ting er å trampe på reir og å jage fugleungar, men å ta seg ein kaffikopp i ein vik, meiner eg må vere heilt ok. Dessutan; viss vi som padlar skal ta 50- metersgrensa alvorleg, er det knapt mogleg å kome seg ut på sjøen frå land.

Utsikt mot Grytøyra:

Her har vore fugl, i alle fall: